ستوك تايمز

هذا منتدى في تطور مستمر من المواضيع ومن الفئات والمنتديات
 
الرئيسيةالرئيسية  اليوميةاليومية  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخولدخول  

شاطر | 
 

 زواج طفلة بقلم مال الشام

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin


المساهمات : 836
تاريخ التسجيل : 16/07/2014

مُساهمةموضوع: زواج طفلة بقلم مال الشام    الثلاثاء نوفمبر 14, 2017 5:15 pm

الجزء الاول + الجزء الثاني + الثالث + الرابع + الخامس

كانت لابسه فستان ابيض .. كبير عليها .. ومكياج مخبي ملامحها الطفولية
الناس عم ترقص وتضحك ... وهي عم تلاعب اخوها الصغير الي بحضنها .. كل شوي
نجي امها تاخدو من حضنا وتقلها عيب فضحتينا ... بس رنيم تعند انو بدا ياه
هيك .. خلص العرس .. وفات عريسها وابن عمها ليزفها على بيتها .. بيتها الجديد

ما كانت خجلانه منو ... ولا بكيت لانها طلعت من بيت اهلها .. عادي مشت قدامو وسبقتو .. طلعت بالسيارة
وقالتلو يلا مصعب خلينا نروح عالبيت والله انا كتير كتير نعسانه ..

مصعب : طيب يلا رح نمشي ..

مشيت سيارة العروس ووراها سيارات كتيرة .. و الكل عم يزمر ويغنو ويباركو
و رنيم عم تطلع من شباك السيارة وتضحك و تسلم عالناس .. و جوزها خجلان كتير
بعدين سحبها لجوا السيارة وسكر الشباك

رنيم : شووووو ... ليش سكرتو

مصعب : شو هالتصرف هاد !! كيف هيك بتمدي راسك من الشباك وانتي بالطرحة والفستان

رفعت رنيم كتفها : ليش ؟ شو فيها ؟

مصعب : رنيم .. بعرف انك صغيره بس انتي هلأ تزوجتي المفرو ض تصيري اوعى من هيك

رنيم : انا مو صغيرة عمري 13 !! ليش هيك بتحكي معي ؟

مصعب : خلص وصلنا عالبيت منحكي جوا

نزلو من السيارة .. وزفوهن على بيتهن .. وتسكر عليهن الباب

قعدت رنيم على الكنباية وررفعت رجلها لفوق وهي عم تحاول تفك السكربينه

وقف مصعب عند الباب وتكتف وهو عم يتطلع عليها

رنيم : مااااااا عم اعرف اشلحها

قرب مصعب وقلها نزلي رجلك .. نزلت رنيم رجلها و نزل مصعب عالأرض
و شلحها ياه من رجلها

رنيم : اووووووف اخيراً ... رايحه البس بجامتي

قامت على الغرفة و مصعب مستغرب الوضع

مصعب : معقول اهلها ما فهموها شي ؟!!!شو القصة

رنيم من جوا عم تصرخ

رنيم : مصعب .. جوعااااااااااانه البراد ما فيه اكل

فات مصعب وراها وقلها ما اكلتي بالعرس ؟

رنيم : امبلى بس رجعت جعت هلأ .. انا ببيت اهلي كنت اقدر اكول ايمت ما بدي
هون ما بصير ؟

مصعب : لا بصير كيف ما بيصير .. هلأ بروح بجيب شي لتاكلي

رنيم : طيب لا تتأخر

مصعب : ايه ما رح اتأخر .. يلا سكري الباب وراي

راحت رنيم سكرت الباب .. وفاتت عالبيت تتمشى فيه ... وبعدين فاتت لبست بجامه عليها
صورة قطة .. وشغلت التلفيزون وقعدت تتفرج

بعد نص ساعه رجع مصعب ودق الباب وما فتحتلو رنيم

مصعب : شو كمان ما بتسمع ؟! رح طلع المفتاح

طلع متاح البيت من جيبتو و فتح الباب وهو معصب وحاسس دمو عم يغلي من هالليلة الي مبينه نحس

مصعب وهو عم يصرخ : ساعه وانا رن الجرس ؟؟! ويييينك

وفات عالصالة وشاف رنيم نايمة قدام التلفيزون وفي بايدها الريمود كنترول

مصعب : لا هيك كتير .. عنجد كتير هيك

رمى الأكل من ايدو وطلع الموبايل من جيبتو

مصعب : الو امي ؟

ام مصعب : اهلين ابني .. خير شبك ؟

مصعب : انتي مو حاكيه مع رنيم بشي ؟

ام مصعب : لا شو بدي احكي معا

مصعب : لا ولا شي خلص

ام مصعب : شبك ؟

مصعب : انا قلتلك هالجازة كلها مو عاجبيتني .. راح صوتي وانا قلكن هي طفله
هي مو وش زواج .. شو بدي حب فيها بالضبط ما عم افهم

ام مصعب : لك اهدى شو عم يصيرلك .. رنيم بنت عمك ومن لما كنت بأميركا ابوك حكى فيها
وحجزها الك .. بدك تكسر كلمة ابوك يعني ؟!

مصعب : لاااا كل شي الا تنكسر كلمة الوالد ... وانا ان شاء الله اكول هوا ما بيهم
قال جوازة قال ..

سكر مصعب الخط بوش امو .. وتطلع برنيم

مصعب : اديش بدنا نقضي سوا رنيم خانوم ؟ يعني يا رح جننك يا بتجننيني .. بسيطة

فات مصعب على غرفتو .. شغل التدفئة و لبس بيجامتو وفتح النت وصار يحكي مع حبيبتو سناء

#زواج_طفلة_بقلم_مال_الشام

#زواج_طفلة

#مال_الشام

الجزء الثاني

سناء : مبروك يا عريس

مصعب : سناء بالله بلا حكي فاضي .. ليكني معك خلص بئى التلك هي الجوازة حكي فاضي

سناء : مصعب .. انت شايفني جدبة شي ؟ .. ضل هلأ حدا يجبر حدا عالزواج ؟
لا وشو .. قال بنت عمي !! عن اي عصر انت عم تحكي

مصعب : يا حبيبتي .. يا عمري ...يا حياتي .. قلتلك ابي مريض وصحتو على قدو
وحط الي فوقو والي تحتو ليدرسني وتعب علي .. انا وانتي ولاد هاد العصر
بس ابي مو ابن هاد العصر ... راسو ومية سيف انو بنت عمي ما بتروح الا الي
وعمي التاني حسبي الله ونعم الوكيل فيه رمى بنتو هالرميه ... لك سناء ليكها برا نايمه !! فاهمة شو عم قلك

سناء : جد بتحكي ؟

مصعب : ايه بربي .. خلص غيري السيرة والله بس اتزكر بينسلئ بدني

سناء : لكن انا شو احكي ؟!! شو احكي بس قلي .. جد لهلأ مو مسدئة انو اليوم عرسك

مصعب : ههههههههههه عرسي ... ايه عرسي

سناء : مصعب خلص جد ما عم اتحمل ... تصبح على خير

ضل مصعب يبعتلها ويندهلها وما ردت .. سكرت تليفونها ونامت ..

مصعب : هاد الي كان ناقص ... الي سنه بقنعها انو هالجوازة مؤقته وهلأ حردت .. لك اخ بس
الله يسامحك يا ابي ... الله يسامحك

كان مصعب بدو يطفي الضو وينام ... و انتبه انو رنيم واقفة عند الباب عم تفرك عيونها

مصعب : صحيتي ؟

رنيم : ايه ...

مصعب : الاكل بالصالة تركتو بالأرض روحي كلي

رنيم : لا ما بدي .. بدي نام نعسانه

مصعب تغطى وغمض عيونو : ايه نامي .. تصبحي على خير

رنيم قربت ورفعت الغطا ونامت جنبو .. استغرب مصعب

مصعب : رح تنامي هون ؟

رنيم : ايه امي التلي انو لازم صير نام جنبك

مصعب : كتر خيرها والله .. مرت عمي من يوم يومها بتحب الخير .. يلا نوم الهنا

رنيم فوراً غمضت عيونها ونامت .. ومصعب ضل صاحي و رح يجن كل ما يفكر بالي صار معو

بلشت حياة رنيم و مصعب .. بين اخد وعطا .. و مسيارة وعناد

رنيم وافقت على هي الجوازة بكامل ارادتها .. طبعا هن اجبروها بس بشكل غير مباشر

اقنعوها انو يلا رح ترتاحي من المدرسة .. يلا ابن عمك مصعب كتير حلو وبجنن
يلا رح يصير عندك بيت ورح تلبسي فستان حلو ورح يعملولك شعرك
رح يصير عندك غرفة كبيرة ... ورح تطبخي الي بدك ياه
وكل يوم رح ياخدك جوزك سيران .. ورح يجبك هدايا .. ورح يلاعبك
ويدللك ...

اتجوزت رنيم ... على هالاساس .. اول يوم ما بين معها انو هالحكي كلو كزب والزواج ابداً مو هيك

بس بعد اسبوع زواج ... بلشت رنيم تدايئ كتير وتتلبك كتير .. مصعب عطول متدايئ منها

وامها فهمتا واجباتها الزوجيه ... بس لسه عقل الطفلة الي حاملتو ما عم يساعدها لتصير زوجة طبيعية…

اجا مصعب بليلة معصب كتير… فات عالبيت متخانق مع ابوه و رنيم ضلت تنق و ما تركتو بحالو

مصعب: رنيم.. روحي من وشي هلأ

رنيم: ما تحكي معي هيك… انا مرتك فهمان

مصعب: مرتي؟

رنيم رفعت ايدها و اشرت عالمحبس : ايه مرتك شو نسيت المحبس؟

مصعب: طيب… تعي لنشوف يا مرتي

رنيم: مصعب شبك… لك مصعب اتركني اووووف مصعب مصعببببببببببببببب

و بهديك الليلة…. انطفت شمعة الطفولة الي جوا رنيم…. نزلت دمعة حرقت خدها…. مزبوط هو اخد منها حقو الشرعي…
بس بطريقة غير انسانية… تركت بقلبها جرح… و ضل معلم جواتها!!! … حتى ضو النهار… ما قدر يغسل وجعها او يهديها….

#زواج_طفلة_مال_الشام

الجزء الثالث

ضلت رنيم يومين ما تحكي مع مصعب ابداً .. اكلها خفيف وحكيها نادر .. حتى اهلها واهل مصعب لاحظو عليها
ومصعب كان يغطي على الموضوع ويقلهم انو متخانقين شوي وهي عنيده .. ورنيم تطلع عليه
تطليعات كره و عصبيه ... لوقت ما بيوم رنيم كانت طالعه من الحمام وسمعت مصعب عم يحكي على التليفون
كان عم يحكي مع وحده بصوت واطي .. وبلشت تسمعو عم يحكي عن الحب والعشق
ما مسكت حالها وفوراً طلعت بوشو وهو سكر الخط

رنيم : مع مين كنت عم تحكي ؟

مصعب : مو شغلك

رنيم : كيف مو شغلي؟ شو شغلي انا فهمني شو شغلي؟ اغسل واطبخ ونظف و بالليل أ..أ ..أ
سكتت شوي ورجعت كملت حكيها : فهمني شو شغلي

مصعب : يعني انا ما بعرف اهلك مجوزينك و مو مفهمينك شي عن الزواج كيف هيك
لدرجة انو مو مفهمينك انو عادي الرجال ممكن يحكي مع بنات مو مصيبه يعني

رنيم : لا معليش مصعب .. انا فاهمة كل شي ... حتى الشي الي اخدتو غصب عني فاهمتو
بس لا اهلي ولا المجتمع ولا الدين ولا شي فهمني انو الزواج بصير بس لهل غرض هاد .. وانو
لازم قدملك ياه حتى لو غصب عني .. هاد محدا فهمني ياه لو حدا مفهمني ياه كنت ما تصرفت هيك

مصعب : لا مو هيك هو الزواج مو لهاد الهدف اكيد

رنيم : انا ما عدت فاهمة شي لكن .. جد ما عدت فاهمة .. الله ينعن ابو الزواج
الله لا يسامح الي زوجني ايه ؟

هجم عليها مصعب : ولي لسانك بقصو .. عم تدعي على ابوكي وابي مو هيك ؟ عم تدعي عليهن بكل
وقاحة .. مو انتي الي قتلتي حالك على هي الجوازة ؟ هلأ بدنا نكزب ع بعض ع اساس
ما بتعرف مسؤولياتك وشو هو الزواج ؟ شو مفكرة بدي احملك على راسي ودور فيكي

رنيم خافت منو ونزلت دمعتها : مو هيك مو هيك بس انا عم اتعب انا ما كنت اشتغل شغل البيت لحالي
ولا كنت اطبخ كل يوم عند امي وما بعرف اطبخ كل شي بس قبل ما اتجوز امي علمتي كم طبخه
انا ما عم اعرف اعمل شي ... و انت ما بدك ياني ما بتحبني وعم تحكي مع اشكال الوان
هاد الزواج هيك ؟ ما عم اعرف اعمل شي والله ما عم اعرف تعبت بدي ارجع على بيت اهلي اتركني

مصعب تركها وبعد عنها : بتتعلمي .. بتتعلمي .. انا ما عاد رح اجبرك على شي طيب
بس انا ماني مجبور اتحمل طفولتك هون ... بدك كل يوم انزلي لعند امي عالبيت وخليها تعلمك شو مابدك
انا او اي رجال تاني بهل دنيا ما رح يكون عندو غير هيك

رنيم : طيب .. ماشي .. رح اتعلم

فاتت رنيم على غرفتها وفعدت تبكي وتحاكي حالها : ياريت لسه كان اكبر همي انو اكتب الوظيفه للانسه
ولا اتخانق مع رفيتي هدى .. ياريت لهلأ فيني انزل اتمشى بالحارة .. وفيني العب وعيط

هيك صارت رنيم يوم عن يوم تحاول تتوعى اكتر .. بالنظافة والترتيب وكيف لازم تقوم وكيف بتقد الضيافة
وكيف بتحكي بركازة وكيف بتضحك بأدب وكيف بتحاكي جوزها وكيف وكيف وكيف
قواعد كتير مو لعمرها وقوانين جديدة فوق طاقتها .. لوقت ما صارت علاقتها بمصعب مستقرة
بس بدون حب او شغف بيناتهم

كانت مشاعر رنيم عم تتأزم اكتر .. و عم تفوت بحالة أكتئاب بسبب الضغط الي ما عم تقدر تتحملو
بهيك سن .. لوقت ما اكتشفت انها حامل !! طار عقلها من الفرح على عكس مصعب الي انصدم

ما كانت مسدئة حالها انها حامل ومو مسدئة انو رح تصير ام ... والي بيتطلع على المشهد من برا
بستغرب .. كيف طفلة ، رح تعتني بطفلة .. قد ما كانت واعية بس كان شي صعب على الانسان الطبيعي يتقبلو

و للمره التانيه رنيم ما كانت عرفانه شو يعني طفل !! تماماً متل ما كانت عرفانه شو يعني زوج !! بس الله
ما رادلها يتم الحمل .. و مات الطفل بأول أشهرها ... وفاتت بنوبة حزن وبكي طويل كتير
لوقت ما رجعت حبلت

وبلشت سلسلة طويلة من الحبل والأجهاض .. كل طفل تحبل فيه يموت بشهورو الأولى
وجسم رنيم عم يتعب اكتر واكتر ... وام مصعب عم تزت حكي وتحسي براس مصعب

مرت تلات سنين ... حملت رنيم واجهضت قريب الخمس مرات ... لوقت ما توفى عمها ابو مصعب

زعل الكل على الخبر ... وكانت صدمه بالنسبه الهن ... ابو مصعب كبير العيلة
رجال مقدر والو كلمتو وطول عمرها سمعتو متل المسك .. راح وما ترك شي وراه
الا السمعه الطيبه والاخلاق الحميدة .. و لوقت ما خلصت الاربعينية
وفاقت ام مصعب من حزنها وصدمتها

وبلش مصعب ياخد نفسو ويفكر انو الي كان جابرو على هالجوازة ما عاد بالدنيا

بلشو يرسمو لزواج جديد لمصعب ... ام مصعب مشان الولد
ومصعب مشان يجدد سعادتو بزواج جديد ..

كانت رنيم بهاد الوقت تتنقل من دكتورة لدكتورة ومن شيخ لشيخ
شي يقلها سحر وشي يقلها عين والأطباء يعطوها دوا من كل شكل ولون وهي ناطف قلبها على ولد

لوقت ما كانت عم تحط العصير لمرت عمها ..و ندهتلها وقالتلها تعي كنتي لشوف

رنيم : ايه مرت عمي

ام مصعب : شو رأيك ببنت ابو عبدالله ؟

رنيم : انو وحده فيهن ؟

ام مصعب : الكبيرة

رنيم : سعاد اصدك ؟

ام مصعب : ايه هي

رنيم : ياااخ بتجنن هالبنت مو مصعب ؟

مصعب عمل حالو ما سمع وما رد

ام مصعب : يعني انتي بتحبيها ؟

رنيم : عادي ما بجتمع فيا كتير بس ظريفه البنت

ام مصعب : ايه منيح طمنتيني

رنيم : ليش مرت عمي ؟

ام مصعب : لا ولا شي حبيبتي بس بدنا نخطبها

رنيم : لمين ؟ لسعيد ؟ بس سعيد كتير صغير

ام مصعب : لا كنتي .. بدنا نخطبها لمصعب ... جوزك

#زواج_طفلة_مال_الشام

الجزء الرابع

رنيم : ههههههههههه يبعتلك الهنا يا مرت عمي

ام مصعب تطلعت بابنها وهي مستغربة وقالتلتو : شبها مرتك مو مسدئة انو بدنا نخطبلك .. قلها انو بدك تخطب

رنيم اختفت ضحكتها واتطلعت بمصعب مستغربة

مصعب تلبك : ايه ..ايه يعني شو فيها بدي اتجوز .. عادي

رنيم ما عاد طلع صوتها وهي عم تطلع بمصعب وامو

ام مصعب: بس الله يرضى عليكي لا تزعلي ها .. نحنا رح نجيبها بس مشان الولد
بس انتي بتضلي الأضل بتعرفي حالك غالية

رنيم : انتو عم تمزحو معي ولا عم تحكو جد ؟

ام مصعب : يوه .. يعني ليش كل هالصدمة شو ابني اول واحد بدو يتجوز التانيه
بعدين النا تلت سنين ناطرينك ومنعالج فيكي وما كنتي تتعالجي شو نعمل يعني

رنيم بعصبية : لك مصعب بدك تتجوز علي ؟؟؟؟؟؟؟ لك بدك تتجوز علي وتجبلي ضرة ؟

مصعب : انا بس مشان الولد طولي بالك

رنيم : الله لا يوفئك .. لك شو بدك اعملك اكتر من هيك .. ازا بضحك بتئلي حاج ولدنه
ازا بشتهي شي بتئلي حاج ولدنه ... ازا بقول اخ بتئلي حاج ولدنه
شفت معك الموت وانت تئلي حاج ولدنه .. ما خليت طبيب ولا دوا ولا عشبه وانا بدي جبلك ولد
تعلمت كل شي متل ما بدك ... و بطلت ولدنه ... و بدك تتجوز علي .. لك بدك تتجوز علي

سكت مصعب وما رد

ام مصعب :ايييييه حاجه بئى ما بكفي ابني تحملك لركزتي وعقلتي ..بعدين قلنالك نحنا بس بدنا الولد

رنيم : ابي بيعرف ؟؟ ابي بيعرف انو بدكن تجيبولي ضره ؟ ازا مات عمي مفكريرن صرت بلا سند ؟
والله لخلي ابي ياخدلي حئي منكون ... ماااشي يا مصعب ... بسيطة

وقامت رنيم ركضت على غرفتها لبست تيابها وطلعت من البيت ومصعب بدو يلحقها وامو ما خلتو
قالتلو اتركها

مصعب : وبلكي عمي عصب علينا !!شو رح نعمل

ام مصعب : حسبت هالحساب حبيبي .. نحنا بدنا ولد .. وهو شايف بنتو
النا تلت سنين منعالجها ما الهن حكي عندنا .. بس انت ما في داعي تورجيهن انك خايف

مصعب : امي

ام مصعب : شو ؟

مصعب : حلوة سعاد ؟

ام مصعب : يبعتلك حمى شو عينك فاضيه .. ايه حلوه اطمن .. حلوه

حردت رنيم ببيت اهلها وراحت تبكي بحضن ابوها وتحكيلو شو صار فيها وهو حاول يهديها
بس ببقلبو كان مكسور وما بايدو شي يتصرفو لان مصعب عندو حجة للزواج

ضلت رنيم ببيت اهلها شهرين و ما حدا سأل عنها بنوب وبيتين العم تقاطعو وما عاد زاررو بعض بنوب
والوضع كان كتير هادي وفي صمت مخيف

لوقت ما تفجرت زغاريد بالحارة ... وطلعت رنيم تتفرج من البرنده .. لوقت ما شافت الفرح
ببيت ابو عبدالله ... حطت ايدها على قلبها وفاتت على جوا وصارت تستغفر

فاتت اختها لعندا

رنيم : استغفر الله استغفر الله استغفر الله

مي : شبك رنوم ؟

قامت رنيم بسرعه ومسكت اختها : مي .. حطي على راسك وانزلي على الحارة
اعرفلي خطبة مين الي تحت ؟

مي : لااا ؟ من عقلك ؟

نزلت دمعة رنيم : مشان الله انزلي بسرعه خايفه يكون مصعب عملها

مي : شو؟؟؟؟

رنيم : تعي تعي

اخدت اختها عالبرندة وقالتلها اطلعي العالم عم تفوت تطلع عليهن وصوت الزغاريد جاي من عندون مشان الله
البي رح يوقف ..

مي حطت شال على راسها : استني ما تخافي بنزل بسرعه بجيب الخبر وبجي

رنيم : مشان الله ما تتاخري ..

بعد دقايق رجعت مي وهي حامله معها الخبر المر .. فعلاً كانت خطبة مصعب على سعاد
جنت رنيم وصارت تبكي وتعيط واهلها يهدوها وابوها وجعو قلبو عليها
صبيه بعمر 16 دبحها القهر والوجع

زواج وحمل واجهاض وخيانة زوجها الي كانت تشوفها كل يوم بهل تلت سنين
واخر مصايبها كانت الضرة

بعد اسبوعين .. كان محدد زواج مصعب الشهر الجاي ..
سمعت رنيم انهم اسعفوه على المستشفى وانو في سيارة ضربتو
صار قلبها يغلي ويفور لان شو ما عمل فيها بس بالنهاية هي فتحت عيونها ووعيت عليه

قلها ابوها مشان تروح عالمستشفى تزورو بس رفضت وقالتلو هو يروح ويطمنها عليه
وبالفعل راحو زاروه وكانت حالتو خطيرة
ضلو تلات ايام بالمستشفى

وبعدا رنيم حست انو لازم تروح تزورو وخافت يموت وهي بعيده

راحت مع امها وخواتها عالمستشفى .. و كانت امو لمصعب واخوه هنيك كمان

رنيم : مرحبا

ام مصعب : روحي من هون وليه .. والك عين تجي
اصلا اول ما يقوم مصعب بالسلامة بدي خليه يطلقك

سعيد : امي اسكتي مو وقتو

ام مصعب : لا وقتو ونص .. ابني الو تلات ايام مرمي ما خطرلها تجي تطمن على جوزها

مي : لو سمحتي احترمي حالك واحكي مع اختي متل الخلئ

ام رنيم : مي اسكتي عيب

مي : عيب عليها مو علينا

وهن عم يزتو حكي ... اجا الدكتور و وقف معهن ووهو متلبك كتير وفي بتمو حكي

سعيد : اهلين دكتور ... طمنا صحي اخي ؟

الدكتور : يا جماعة بصراحة في مشكلة ولازم نحلها بسرعه

ام مصعب : شو في؟

الدكتور : السيارة لما ضربت مصعب سببت خلل بوظائف الكلى .. الكليتين متضررات
في وحد توقفت تماماً عن العمل والتاني عم تشتغل بس مو بشكل كامل

سعيد : شو يعني ؟

الدكتور : يعني لازم تدبرو متبرع باقرب وقت لننقلو كلية سليمة

ام مصعب : شوووووووووووو ... شو عم تقول انته شو عم تقول
يا ضيعان شبابك يا ابي ... ااااااااااااخ يا ربي ااااااااااخ

الدكتور : لو سمحتي يا مدام تهدي .. هلأ العياط والصوت العالي ما منو اي نتيجة
لازم تدبرو متبرع

ام مصعب : انا ... انا رح اتبرعلو

الدكتور : الموضوع مو بهي البساطة .. لازم نعمل فحوصات ونتاكد انو منقدر ناخد كليتك

ام مصعب : طيب وين فينا نعمل الفحوصات ؟

الدكتور : تفضلي معي

سعيد : لحظة وانا بدي اعمل فحوصات

ام مصعب : رنيم ... وانتي كمان

رنيم : شو ؟ انا ؟

ام مصعب : ايه وانتي ... يلا امشي

رنيم : بس انا

مي : شو بدك فيها ؟

ام رنيم بصوت واطي : خلص امي روحي معهن وسايريهون روحي

رنيم : امي ما بدي بخاف

ام رنيم : روحي ما بدنا تكبر بالمستشفى خلص روحي

دكتور : يلا تفضلو معي

مشيت امو لمصعب و اخوه .. ولحقتهن رنيم وهي خايفه

فاتو عملو تلاتتهن التحاليل و عملو كل الاجراءات وطلعو لبرا

سالت رنيم الدكتور ازا فيها تشوف مصعب وسمحلها تشوفو خمس دقايق ..

فاتت على غرفتو ولقت مركبه عليه كل الأجهزة ... قعدت جنبو ومسكت ايدو

صارت تتزكر كل شي من اول ما تزوجت .. ونزلت دمعتها بحرقة

رنيم : ازعل منك ؟ ولا ازعل من حالي ؟ ولا ازعل من ابي ؟ ولا ازعل من ابوك ؟
انت قلي .. من مين ازعل ؟ .. عنجد بس احكيلي .. مين ظلمني اكتر شي ؟
بتعرف ؟
ئلك شغله ؟ كتير شغلات كسرتني .. مو انت السبب لا .. السبب انو انا ما كنت جاهزة
انا فكرت حالي جاهزة .. انبسطت كتير انو رفقاتي غارو مني
وانك شب حلو كتيرررررررر ... بس لقيت حالي بمكان اكبر مني
مصعب ... انا بكون كزابة ازا التلك انو البي صافي عليك
مو لانك ما تحملت طفولتي وجبرتني اكبر قبل عمري
ولا لانك كنت تجبرني لتاخد حقوقك
ولا لانك ما كنت تعاملني بحنية
بس ما عم اقدر سامحك لانك كل يوم .. وكل ساعه .. وكل دقيقة
كنت تحرقني بنار الخيانة .. كل يوم رسالة من بنت .. وكل يوم اتصال مع وحده
انا كنت شوف كل شي ايه بس كنت اسكوت لان خاف منك تضربني
و سناء الي كنت تحكيلها عني وعن هبلي وانك مو طايئني
لهيك ما عم يصفى البي عليك .. بس العشرة ما بتهون الا على ولاد الحرام

طلعت رنيم ورجعت على البيت هي واهلها ...و تاني نهار اتصلت فيها مرت عمها وقالتلها تجي على المستشفى بسرعه

ارتعبت رنيم ونزلت فوراً هي وامها وابوها .. وبس وصلت ركضت عليها ام مصعب ضمتها

رنيم خافت : شوفي ؟ مصعب صارلو شي؟

ام مصعب : حياة ابني بين ايديكي .. مشان الله يا بنتي لا تخليه يروح

رنيم : لك شو في ؟

اجا سعيد من بعيد وقرب منهن

رنيم : لك سعيد شو عم يصير

سعيد : طلعت نتائج الفحوصات ... لا انا ولا امي منقدر نتبرعلو ... بس انتي بتقدري

رنيم : شووووووووووووو ؟؟

ام رنيم : شو بس هي ؟ شو عم تحكو

ام مصعب : مشان الله مشان الله تنقذي ابني ... لا تخليه يموت لا تخليه يموت

علقت ام مصعب وام رنيم وصارو يتخانقو ورنيم عقلها مو معها ..بعدت عنهن وقعدت على كرسي بعيد

لحقها ابوها وحط ايدو على كتفها : شو يا بنتي ؟

رنيم : شو؟؟؟؟؟شو شو ؟؟مستحيل ... ما فيني بخاف .. ما بقدر
كيف اعطيهن كليتي ما فيني بخاف

ابو رنيم : بس مصعب رح يموت

رنيم : لا .. مندورلو على متبرع .. خلي الكل يفحصو .. الكل يفحصو

ابو رنيم : متل ما بدك .. لا حول ولا قوة الا بالله

رفضت رنيم تتبرع وطلعت من المستشفى وهي خايفه ومرعوبة

وضلت تلات ايام عم تشوف كوابيس بمصعب وتشوفو عم يطلب منها تساعدو مشان ما يموت
وسمعت ابوها عم يقول لامها انو ما حدا رضي يتبرع

صلت رنيم استخارة بهديك الليلة ... ونامت ... وصحيت وما عرفت كيف راحت لعند ابوها وقالتلو انو
بدها تروح تتبرع لمصعب بكليتها !! صارت امها تصرخ وتضرب على وشها
ورنيم مو مقتنعه بالشي الي عم تقولو !! بس مو عارفه كيف طلع منها !!

بسرعه خيالية المستشفى حضر كل الاجراءات وجهزو غرفة العمليات لينقلو الكلية لمصعب
لان حالتو بخطر

فوتو رنيم وهي مرعوبة كتير والبها عم يدء بسرعه .. عم تطلع بوجوه الدكاترة .. وبضو غرفة العمليات

رنيم : دكتورة

الدكتور : نعم بنتي

رنيم : رح اتووجع ؟

الدكتورة : عدي للعشرة هلأ

رنيم : واحد
وصارت تتزكر حالها لما امها ندهتلها وكانت تلعب بالحارة مشان تخبرها بموعد عرسها

تنين
صارت تتزكر كيف راحت نقت فستان العرس يكون منفوخ كتير من تحت

تلاته
صارت تتزكر كيف لما طلعت حامل وصارت تنطر بابنها

ارب

اربع

اربعه

الدكتورة : اديش هدول ؟

رنيم : مو .. ش .. ا..ي..ف..ه ( مو شايفه)وغابت عن الوعي ونزلت من عينها دمعه

يتبع .....
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://6730.arabrevolution.biz
Admin
Admin


المساهمات : 836
تاريخ التسجيل : 16/07/2014

مُساهمةموضوع: رد: زواج طفلة بقلم مال الشام    الثلاثاء نوفمبر 14, 2017 5:15 pm

الجزء السادس + السابع + الثامن + التاسع + العاشر + الحادي عشر #تمت

كانت العملية مو سهلة بنوب .. والكل برا كانو خايفين ومتوترين .. مر وقت طويل لطلع الدكتور وخبرهن انو
رنيم ومصعب التنين مناح كتير والعملية مشيت متل ما بدهن تماماً بس لازم يمر وقت ليتأكدو من تجاوب مصعب

تاني نهار فتحت رنيم عيونها وهي كتير موجوعه واهلها حواليها

ام رنيم : بنتي الحمدلله على سلامتك

رنيم : ههه

ام رنيم : ليه عم تضحكي ؟

رنيم حكيت بصعوبة : شو كنت بتمنى تقوليلي الحمدلله عالسلامة وانا جايبه قطعه من على هالدنيا
يعني شقفة ولد .. بس ليكي الدنيا .. سمعتها بعد ما اخدو شقفة مني

كلمات رنيم نزلت على ابوها متل السم .. حس حالو انهد .. تطلع ببنتو وهي ممدده عالتخت
وشها شاحب .. بكلية وحده .. وموجوعه
وجوزها ما هناها ولا لحظة

طلع من الغرفة وهو مو شايف قدامو .. دور على زاوية وبكي فيها ..

بعد اربع ايام تحسنت رنيم شوي .. ومصعب كمان تحسن وخبروه انو رنيم الي تبرعتلو بكليتها
انصدم كتير وما سدء شو سمع انو كيف بعد كل شي عاشتو معو هي الي بتتبرعلو بكليتها

كانت رنيم تعبانه كتير لان جسمها ضعيف .. ونفسيتها كتير تعبانه وهي عم تفكر
انو في شي جواتها ناقص ... بس ضلت تتعوض رب العالمين

#بعد_شهرين

مصعب : رنيم تعي حطيت العشا

رنيم : يلا جايه بس لاكتوب الوظيفه

اجت رنيم وقعدت على الأكل وبلشت تاكول

مصعب : كيف معهدك ؟

رنيم : منيح بس كل الي معي اكبر مني بحسهن هن ازكى مني وبستوعبو اسرع

مصعب : معليش انتي بس ركزي بدروسك

رنيم : ايه عم حاول

كملو اكل وهن ساكتين ..

مصعب : رنيم

رنيم : ايه قلي

مصعب : بحبك

رنيم : الاكل كتير طيب

مصعب : رنيم

رنيم : دوء هاد الصحن عنجد بشهي

مصعب : بحبك

رنيم : خلص شبعت الحمدلله

قامت رنيم ولحقها مصعب عالغرفة

مصعب : والله بحبك ليش هيك عم تتصرفي

رنيم : طيب فهمت انك بتحبني شو اعمل

مصعب : طيب كيف برضيكي ... خطبتي وفسختها .. وبنات بطلت احكي
و سجلتلك دورات لغة باحسن المعاهد مشان ما تحسي انك ناقصه عن حدا
شو اعمل اكتر

رنيم : انا نعسانه تصبح على خير

غمضت رنيم عيونها وشدتهن بقوة مشان ما تنزل دمعتها وهي عم تفكر : عملت هيك لانك بتحبني
ولا لانك اخدت كليتي !! كل شي بسعرو يا مصعب

نام مصعب جنبها وهو كمان عم يفكر : كيف رح ترضي علي ؟ اعطيتيني كليتك
ما فييكي تعطيني البك ؟

مرت الأيام .. أسابيع .. وشهور ... وكمان سنتين

و رنيم كانت تمنع حالها من الحمل لانها خايفه من الأجهاض كمان مره
و علاقتها بمصعب دافيه كتير ومستقرة .. اخدت دورات لغة انجليزي و فرنسي و دورات حاسوب
وقدمت اوراقها عالمعهد نفسو الشي درست فيه بس ما قبلوها لان عمرها 18 سنه

حاولت تقدم بمعاهد تانيه .. وساعدها بمصعب تقدم بكل مكان وبكل الشركات بس محدا رضي يوظفها
وما في غير عم تسمع كلمة ( خريجين الجامعات مو ملاقين شغل لنشغلك انتي ) لهيك قررت
ترجع تسجل بالمدرسة .. صارت مشكلة ببيت حماها مشان هالموضوع
كانت رنيم بالمطبخ عم تحط عشا ومرت عمها ومصعب وسعيد بالغرفة جوا

سمعت اصواتهن طالعه .. وقربت لتسمع شو عم يحكو

مصعب : انا جوزها وانا بقرر تسجل او لأ

ام مصعب : لا مو على كيفك .. ما بكفي دفعت عليها للمعاهد خيرات الله
وما بكفي انها معلولة وما بتجيب ولاد

مصعب : بكفي .. هي المعلولة اعطتني كليتها

ام مصعب : بالله ؟ مو بكيفها ابوها جبرها

مصعب : لا بكيفها .. هي اعطتني الي انتي ما رضيتي تعطيني ياه

ام مصعب تغير لون وشها و اطلعت بسعيد وعيونها كلهن خوف

سعيد : ايه امي انا قلتلو .. قلتلو انو نتيجتك ونتيجة رنيم تطابقت
بس انتي رفضتي تتبرعي و خليتي رنيم تتبرع غصب عنها

ام مصعب : سعيد !!

مصعب نزلت دمعتو وصار في بحة بصوتو : طيب هي الطفلة شو ذنبها
جسمها شو بدو يتحمل ليتحمل ؟ كم مره اجهضت ؟ و تبرعت بكليتها
شو بدنا ناخد منها بعد اه ؟

ام مصعب : انا كنت ناوية اتبرعلك لو هي رفضت والله يا ابني ... مستحيل كنت خليك تموت مستحيل
لك انت ابني

وقربت منو وحطت ايديها على وشو وهو عم يبكي

ام مصعب : والله انا بس كنت خايفه وقلت رنيم صبيه وبتتحمل بس انا ما رح اتحمل
بس لو هي ما قبلت انا كنت رح اتبرعلك حتى قلت لسعيد ... سعيد قلو .. قلو

سعيد غص وما قدر يحكي ...

رنيم كانت عم تسمع كل الحكي ... شهقت شهقة قوية و حطت ايديها على تمها لتخبي صوتها وتخفي
عبرتها ... ودموعها نزلو متل الشلال ...
ركضت عالمطبخ وشغلت مية الحنفية وحطت وشها تحت المي وصارت تبكي وترش المي على وشها
كانت تقول : يااااااا الله ... يااااااااا الله

وقلبها من جوا عم يصرخ معها : يااا الله ... يا الله

#زواج_طفلة_بقلم_مال_الشام

الجزء السابع

غسلت رنيم وشها وطلعت من بيت عمها بسرعه ... راحت على بيتها رمت حالها عالتخت وصارت تبكي

رنيم : يارررببيييي اخدو مني طفولتي .. واخدو مني ضحكتي .. وما رزقتني ببشقفة ولد .. واخدو مني كليتي
يا ربي ... ياربي دخيل اسمك قلبي محروووق ....يااااااااااااااااااارب لا تتركني يارب
ياااااااااااا رب لا تتركني يا رب ...يا الله ما عاد متحمله يا الله

ضلت رنيم تصرررخ لوقت ما سمعت صوت باب البيت عم ينفتح ... قامت وتضغطت تحت الغطا
و كان مبين حركة انفسها وصوتها عم تبكي

وقف مصعب عالباب

مصعب : رنيم ؟

رنيم كانت عم تحاول تخنئ صوتها

مصعب : لك رنيم

قرب منها ورفع الغطا

مصعب : رنيم شبك ليش هيك وشك ؟

انفجرت رنيم بكي وما ردت عليه

وهو عم يحاول يحكي معا وهي ما عم تتجاوب معو بنوب

شدها مصعب لصدرو وضمها

مصعب : يا عمري شبك .. شبك فهميني

رنيم صارت تحكي وصوتها يقطش من كتر البكي : انا تعبانه .. تعبانه كتير

حط بمصعب بايدو مي وغسللها وشها

ورجع حضنها

مصعب : حدا زعلك ؟

رنيم : لا بس مخنوئة

مصعب : طيب .. قومي معي

رنيم : وين

مصعب : بس قومي

رنيم : ما بدي اتركني ما بدي

مصعب : لك بلا عناد قومي

قامت رنيم معو وهي عم تهدا بالتدريج .. طلعو من البيت وهي مو عارفه لوين ماخدها مصعب
وفجأة ما لقت حالها الا قدام مدينة ملاهي كبيرة كتير

رنيم : ليش جايبني لهون ؟

مصعب : مو انتي مخنوئة ؟

رنيم : ايه

مصعب : هون بتشمي هوا .. يلا تعي نفوت

شدها لجوا واشترا تذاكر

مصعب : بشو بدك تركبي ؟

رنيم : امانه رجعني على البيت

مصعب : رنيم امانه لا تنزعيها بئى خلص خلينا ننبسط

رنيم : طيب

مصعب : تعي نطلع بهي السفينه

رنيم : لا بخاف

مصعب : تعي انا معك

طلعو بالسفينة ولبشت ترتفع فيهن والكل يصرخ ورنيم بدون شعور ضحكت
حست الهوا عم يفوت لالبها وينظفو
وكانت تتفرج عالناس من فوق وهن عم يضحكو ويلعبو

مصعب : شايفك ما خفتي

رنيم : ما جربتها من قبل شكلها من تحت بخوف

مصعب : هههههه دخيل هالضحكة

بعدين نزلو وفاتو على بيت الرعب ... كل شوي تنقز رنيم وتتخبى ورا ضهرو لمصعب

اشترو بوشار وتمشو وغزلة وبالوانات ملونه .. وماخلى لعبه ما لاعبها لرنيم لوقت ما سكرت مدينة الملاهي

طلعو وقالتلو رنيم انها حابه تتمشى ما بدها تطلع بتكسي

مصعب : ليش كنتي عم تبكي اليوم ؟

رنيم : ولا شي بس هيك متدايئة كنت

مصعب : ومين مدايئها لمرتي ؟

رنيم : خلص ليكني روقت

مصعب حط ايدو على كتفها : حبيبي .. تروحي بكرا نسجلك بالمدرسة ؟

رنيم : ايييييييييييييييييييه .. اصدي .. لا .. ما بدي

مصعب : ليش ؟؟؟؟؟؟

رنيم : خلص ما عاد بدي

مصعب : مو على كيفك .. بدي سجلك

رنيم قربت منو اكتر و هو استغرب

مصعب : شو هالدلال ... كيف غلطتي وقربتي لحضني

رنيم : ههههه بدك بعد ؟

مصعب : طبعاً لأ .. ما بسمحلك تبعدي

رنيم : تعا نقعد هون

مصعب : بالشاااارع ؟؟

قعدت رنيم بالأرض : ايه تعبت

مصعب : رنيم قومي يا دبه

رنيم : هئة ... تعبت

مصعب : مجنونة قومي

رنيم : هئة ما بدي

تطلع مصعب حواليه ... : يعني مصره ؟

رنيم : ههههههه ايه

مصعب : ماشي

قرب وقعد جنبها وحط ايدو على خدو

مصعب : يلا تفضلي

رنيم : ههههههههههههههههههه

مصعب : شو مو هيك بدك ؟

رنيم : ههههههههههه قوم قوم ليك العالم كيف عم يتطلعو

وقفت رنيم ومسكها من ايدها وقعدها

مصعب : لا ما في تقومي ... اقعدي لشوف

رنيم : لك مصعب بلا جنان

مصعب : اقعدي لشوف

رنيم : مصعب صرنا بنص الشارع السيارات بدها تمر

مصعب مسك ايديها التنتين : يا روح مصعب ... يا عيون مصعب .. ولك يا حياتو

رنيم : انت شايف انو المكان مناسب ؟

مصعب : لكن وين المكان المناسب ؟

رنيم احمرو خدودها : ببيتنا

مصعب : هههههه نقوم على بيتنا ؟

رنيم نزلت عيونها بالأرض : منقوم

مصعب : وبتخليني على راحتي ؟

رنيم : ههه بخليك

مصعب : لك دخيل الي خلئك ما اطيبك .. يا الله لو تكبري مية سنه بتضلك طفلة

رنيم قامت ونكتت تيابها

ولحقها مصعب .. وضلهن يتمشو ويحكو لوصلو عالبيت

مصعب : استني استني

رنيم : شووو في

مصعب : فوتي برجلك اليمين

رنيم : ههههههههه اجدب .. يلا هي فتت

فات مصعب وسكر باب البيت

مصعب : غمضي عيونك

رنيم : ليه ؟

مصعب : خلص بس غمضيهن

غمضت رنيم عيونا .. وقرب مصعب وباسها على خدها
و حط ايدو على عيونها

مصعب همسلها : بحبك

رنيم : وانا

مصعب : وانتي شو ؟

رنيم : وانا .. بح

مصعب : ايه ؟

رنيم : بحب

مصعب : اييييييه ؟

رنيم : بحبك

#زواج_طفلة_بقلم_مال_الشام

الجزء الثامن

مصعب: طالعه من البك؟

رنيم غمرت وشها بحضنو : ايه والله من البي… لو ما بحبك ليش لهلأ قاعده عندك؟ مع انو اهلي قلولي ازا بدي الطلاق بوقفو معي… بس انا وعيت عليك بحسك كل حياتي مع انو تعزبت معك كتير

مصعب حط ايدو على شعرها و شدها: والله رح عوضك… انتي بتتقلي بالدهب… رح عوضك

رنيم: ان شاء الله

مصعب غمزها : يلا نفوت على غرفتنا

رنيم: ههههه يلا…

صارت حياة رنيم و مصعب كلها حب و دفا… رنيم رجعت عالمدرسة و بلشت دراسه و مصعب كان يداريها كتير و يهتم فيها بس كان منغص عليهن شي واحد!!! كان ناقصهن طفل يعبي حياتهن و يكبر هالحب الي بيناتهن… ومتل ما قال ربنا عز و جل: (( مَا أَصَابَ مِنْ مُصِيبَةٍ فِي الْأَرْضِ وَلَا فِي أَنْفُسِكُمْ إِلَّا فِي كِتَابٍ مِنْ قَبْلِ أَنْ نَبْرَأَهَا إِنَّ ذَلِكَ عَلَى اللَّهِ يَسِيرٌ )) .(الحديد:22)

بيوم من الايام كانت رنيم راجعه من مدرستها و لقت قطة بالطريق مكسورة رجلها… قربت منا رنيم و صارت تلاعبها و حملتا و حطتا على جنب و راحت جابتلها اكل و اجت تطعميها… مرقت ختيارة بالطريق و ندهت لرنيم

رنيم: ايه خالة

الختيارة: بنتي لا تقربي عالقطط… بلا ما تنقلك شي جرثومة و ما يعود يجيكي ولاد

رنيم: هههههه خالتو شو دخل القطط بالاولاد هي كلها خرافات

الختيارة: بنتي انا ماني جاهلة انا بس زعلت عليكي و حبيت انصحك و اسالي اي دكتور...في جرثومة اسمها جرثومة القطط بتنتقل لبعض الناس و بتسببلهن العقم… و بعدين على راحتك

و مشيت الختيارة و رنيم مصدومة و متفاجئة!!! ..

ضلت رايحه عالبيت و قالت لمصعب الي صار معها وهو كمان انشغل بالو

رنيم: انت متعلم ما بتعرف هالمعلومة؟

مصعب: لا والله انا دارس محاسبه شو فهمني بالطب!!!

رنيم: مصعب… بدي ولد

قام مصعب وحضنها: لا تزعلي ان شاء الله ربك بيرزقنا… بكرا منروح عالدكتورة و منسألها…

تاني نهار غابت عن مدرستها و راحو عالدكتورة و سالوها عن هاد الموضوع… وهي جمدت بمحلها

الدكتورة: بس انا سالتك ازا كنتي تلاعبي القطط و انتي صغيرة و قلتي لا!!!

رنيم: دكتورة انا ما اهتميت بالموضوع بس امبارح حكيت امي و التلي انو كان عنا ئطة لما كان عمري 6 سنين… و انا ما كنت متزكرة بنوب

الدكتورة: مو معقووووووول….. شو هالجهل هاد!!! الك حارمة حالك من الامومة خمس سنين لانك ما بتعرفي هالمعلومة

رنيم: بس انا

مصعب: دكتورة رنيم مو ذنبها هي تزوجت وهي طفله… المهم هلا بدنا نتاكد!!

الدكتورة: اعملي هدول التحاليل و ارجعي لعندي فوراً.. و ازا هي المشكلة فحلها بسيط و رح تحبلي باذن الله

رنيم: عنجدددد؟

الدكتورة: ايه والله بس قولي يارب

رنيم و الدمعه بعينها: ياااارب… يارب

عملت رنيم التحاليل و احدتهن للدكتورة و بالفعل طلع معها الجرثومة…. بلشت علاج منها و كان علاجها بسيط… و بعدا صار في مجال للحبل و كانت رنيم كتير خايفه ترجع تحبل و يصير معها اجهاظ…

مصعب: رنيم تعي الفيلم بلش

رنيم: شوي جايه

مصعب: الك ساعه جوا شو عم تعملي…

طلعت رنيم و ملامحها غريبه و لونها مخطوف

رنيم: مصعب

مصعب: شبك كأنك شايفه شبح؟

رنيم حطت ايدها على بطنها: انا حامل

وقف مصعب وهو متجمد: متاكده؟

رنيم: ايه… عدت الفحص اربع مرات… والله حامل

ركض مصعب و حملها و صار يلف فيها و يصرخ: ولك بحبببببببكككك بحبببببك

رنيم تمسكت فيها و شدتو كتير و هي عم تبكي: كتير بحبك

مصعب فقد توازنو و كان رح يوقع رنيم… بس مشان ما يوقع فيها لقدام حاول يرجع لورا و ضرب ضهرو بالكنبايه و وقع هو و رنيم

مصعب: اااخ

رنيم: مصعب صارلك شي؟

قامت رنيم و حطت ايدها على خدو: انت منيح؟

ابتسم مصعب و ركن راسو عالكنبايه: احسن من اي وقت والله

حطت رنيم راسها على كتفو: بيوجعك شي؟

كان مصعب حاطط ايدو على مكان كليتو وعم يتوجع و يحاول يخبي وجعو…

مصعب: لا بس اندوخت… اسف

رنيم: مصعب عم تتعرق شبك؟

مصعب غمض عيونو بقوة وهو عم يتوجع و صرخ: اااااخ

رنيم: مصعب شبك!!! مصعبببببب!!!

#زواج_طفلة_بقلم_مال_الشام

الجزء التاسع

مصعب : ولا شي ما بني شي

رنيم : كيف ما فيك شي ؟؟؟؟؟؟؟؟؟؟

مصعب : بس ضرب ضهري بالكنباية و وجعني شوي بس ما في شي .. تعي لحضني لشوف

قربت منو رنيم وضمتو وهي لسه خايفه .. صار مصعب يلعب بشعراتها

مصعب : شو بدنا نسمي ابنا او بنتنا ؟

رنيم بهدوء : متل ما بدك يا عمري

مصعب : طيب ساعديني مشان قوم و اتمدد بالتخت

رنيم وقفت ومسكت ايدو لتساعدو : يلا تعال

وقف مصعب وكابر على وجعو وتمدد بالتخت .. وعمل حالو نام بسرعه بس هو كان وشو بالاتجاه التاني عن رنيم
وعم يتوجع ..

كملت رنيم مدرستها وكانت خايفه كتير اي حدا يعرف انها حامل ... وبلشو يتابعو حملها عند الدكتورة وهي تطمنهن انو كل شي منيح
تجاوزت مرحلة التلات شهور .. وبهيك ارتاحت نفسيتها انها تجاوزت مرحلة الخطر لانها دايماً كانت تخسر الجنين بهل فترة
ورجعت هي و مصعب عالبيت وهن كتير مبسوطين .. وبس فاتو ..

مصعب : رنيم تعي معي

رنيم : لوين ؟

مصعب : لك بس تعي

اخدها مصعب و وقفو قدام غرفة ... وحط ايديه على عيونها وفتح الباب

مصعب : فوتي

رنيم : لك شو في مو هي الغرفة كانت فاضيه

مصعب شال ايديه : شو رأيك بهي المفاجئة ؟

كانت غرفة صغيرة .. دهنها زهر .. وفيها تخت ابيض صغير لطفل وفوقو العاب
وفيه دبايب كتيييييييير كبيرة وصغيره وملونة ابيض و زهر .. و سجادة زهر ناعمة
وفي بالسقف نجوم ملونة .. والبرادي بيضا و ناعمة
رنيم كانت واقفه مصدومة .. وما عم يطلع معها الحكي ..

مصعب : يمكن ما عجبتك صح ؟ مع انو انا شفت صورة ديكور هيك بموبايلك وفكرتك حابه تعملي متلو
اخدتو و عملت كل شي متل الي بالصورة بالضبط

رنيم كانت لسه عم تطلع حواليها و الدمعة بعيونها من الفرحة

مصعب : خلص عادي منعمل غيرها ما في اي مشكلة

رنيم بصوت واطي : بتجنن

مصعب فرح : شو قلتي ؟

رنيم : لك بتطير العئل .. يا الله ما احلااااااااهااااااااااااااااا ... لك بتجنن بتجنن بتجنن

مصعب :هههه الحمدلله

رنيم : انت احسن اب بالدنيا كلها

مصعب : وانتي احلى ام صغيرة بالدنيا ههههه

رنيم : انا مو صغيره

مصعب مسكلها انفها : صغيرة

رنيم : بس ليش الغرفة زهر بلكي اجى صبي ؟

مصعب : بس انتي حابه تجي بنت .. وانا مشتهي بنت
وازا اجا صبي منعمل غيرها ما تزعلي المهم يشرف بس

رنيم : هههه بعشئك انا

مصعب : والله بدوب فيكي .. رنيم روحي حطيلي عشا

رنيم : عشا؟ ما كنت جوعان

مصعب: هلأ جعت شوي .. حطيلي لقمة اكل

رنيم : ايه يلا على عيني

طلعت رنيم من الغرفة و سكر مصعب الباب ... وقف ورا الباب وضغط على حالو وكان موجوع كتير
كانت هي نغزات الوجع تتكرر معو وتعزبو كتير .. بس ما كان حابب ينغص على رنيم سعادتها بالفترة هي
وكان خايف عليها من الزعل والتوتر .. لهيك كان يتوجع وهو ساكت .. ويخبي وجعو ..

بسبب نوبات الوجع القوية ما عاد قدر يتحمل وراح على الدكتور ... وعملولو فحوصات وشخصو حالتو
وقالولو انو وضعو خطير كتير ولازم يضل بالمستشفى بس ما رد
كان خايف كتير يصير شي لرنيم والطفل الي ببطنها .. بالنهاية هاد الطفل حلمو كمان والو ناطرو
خمس سنين .. وكان خايف اكتر من رنيم انو يخسرو ..

هيك لوقت ما بيوم من الايام .. كانت رنيم زيارة عند بيت الها تلات ايام .. رجعت باليوم التالت
ولقت باب البيت مفتوح ..

رنيم : مصعب ! هيك تارك البيت مفتوح ؟ بلكي اجا حرامي و سرئك مني ؟
فاتت دورت بالغرف : مصعب وينك ؟.. مصعب؟

فتشت الحمامات .. والغرف وما لقتو .. بعدين فاتت عالمطبخ .. ولقت مصعب مرمي بالأرض
البراد مفتوح .. وكاسة مي مكسورة عالارض قدام مصعب ... علبة دوا مسكن جنبو كان يحاول ياخود منا

ركضت رنيم عليه وحاولت تصحية بس ما تجاوب بنوب .. ما عرفت شو تتصرف ...اتصلت باهلها فوراً
ونقلوه على المستشفى

#زواج_طفلة_بقلم_مال_الشام

الجزء العاشر

تفاجئو الكل لما سمعو من الدكتور انو هو منبه مصعب لازم يضل بالمستشفى !! وبسبب اهمالو وضعو تعقد وكليتو
تضررت اكتر هلأ بدهن متبرع جديد لان العلاج ما بيفيد

رنيم : كيف يعني ؟...يعني كل الوقت جوزي عم يتوجع وانا مو حاسه عليه ؟ ومفكرتو مبسوط ومرتاح كمان ؟

الدكتور : مدام رنيم ياريت تتصرفو باقرب وقت وتدبرو متبرع

رنيم : لك من وين بدنا نجيب متبرع .. كيف يعني .. من وين بدنا نجييييييييييييييب متبرررررررررع

اجا صوت ام مصعب من بعيد وهي جايه وعم تركض : انا .. انا بعطيه .. انا بعطيه

الدكتور : طيب تفضلي معي على الفحص

ام مصعب : لا انا فحصت من قبل والنتيجة متطابقة ما تضيعو وقت

الكل كان مصدوم ومتفاجئ الا رنيم لانها بتعرف هالحكي وما كان بهمها شي هلأ انو مصعب يقوم بالسلامة

الدكتور : لا انتي عم تحكي عن فحوصاتك قبل سنتين هلأ لازم نعيدهن ونتأكد .. تفضلي

مشي الدكتور ولحقتو ام مصعب وهي حاضنك شنتتها ومبين على وشها التعب والارهاق

لحقتهن رنيم من بعيد .. وكان قلبها عم يرجف من جوا ..
وتاني نهار وصلتهن النتيجة ... او المصيبة مو النتيجة
ما بصير ام مصعب تتبرع لابنها لان في خطر على حياتها و ممكن تموت بالعملية
جسمها ما بيتحمل ومعها امراض ... ودورو على متبرع تاني

كانت رنيم عم تحاول تضبط اعصابها مشان الطفل الي ببطنها .. بس ما بئى تحملت وانهارت بالأرض وصارت تصرخ: خدو كليتي التانيه
خدو كل شي فيني بس لا تخلوه يموت ... مشان الله اعملو فيني الي بدكن ياه بس لا تتركوه لا تتركوه

ضمها ابوها وهداها ... و وعدها انو رح يتصرف ..

بلشو ينشرو بالجرايد وبكل مكان خبر انو بدهن متبرع للكلى وما كان يجيهن خبر ووضع مصعب عم يتراجع لورا
لهيك رجعو اعلنو انو بدهن يشتروا كلية من اي شخص بتطابق فحوصاتو النتيجة ..

وبالفعل .. بعد يومين .. اجا شخص عالمستشفى وقابل الدكتور وعمل الفحوصات وطلع في تطابق .. وبشكل سريع جهزو المريضين
وجهزو غرفة العمليات ..

بعد ما خلصت العملية طلع الدكتور وطمنهن انو الحمدلله العملية نجحت .. والمريضين بخير

اخدت رنيم نفس كأنو كان محبوس عنها الهوا .. وقفت على رجليها وحضنت اختها مي

مي : مبروك اختي

رنيم : الحمدلله يارب ..

بعد يومين صحي مصعب ورجع لوعيو و لما فتح عيونو لقي رنيم جنبو وماسكه ايدو

رنيم : خوفتني عليك كتيررررررررر

مصعب : كيف الجنين ؟

حطت رنيم ايدها على بطنها : لا تخاف انا كنت عم دير بالي عليه كتير منيح

مصعب : كنت خايف يصرلو شي

رنيم : انا الي رح يصيرلي شي من ورا جنانك...معقول توصل لهل مرحلة وتتحمل كل هالوجع
لهل درجة شايفني ضعيفة وانانية وما اقدر وقف جنبك ؟

سكت مصعب و فات الدكتور

الدكتور : الحمدلله عالسلامة ..

رنيم : الله يسلمك .. دكتور فينا نشوف الشخص الي تبرع لمصعب ؟ وكمان مشان نعطيه المصاري
لان نحنا حطينا مبلغ 500 الف للي بيتبرع ولازم نسلمو ياهن ضروري

#زواج_طفلة_بقلم_مال_الشام

الجزء الحادي عشر #الاخير... #تمت

الدكتور : طيب تفضلي معي

رنيم : حبيبي مصعب برجعلك ايه ؟ انت ريح حالك بحبك

طلعت رنيم ورا الدكتور .. و وقفو بالممر

رنيم : ليه وقفت

الدكتور : مدام رنيم بدي قلك شي مهم انو المتبرع ما بدو مصاري .. الي تبرعت هي ام مصعب
وطلبت نخبي عنكم .. وهي وقت على اوراق اخلت مسؤوليتنا تماماً ازا بصرلها شي
و هي تحملت مسؤولية العملية

رنيم : معقول !! ياربي طيب هي كيفها

الدكتور : مبدئياً منيحة بس لهلأ ما رجعت لوعيها .. عم نعطيها مهدئات لانها عم تتوجع
بس بشكل عام الوضع احسن مما كنا متوقعين

رنيم تكركبت كتير : ما لازم قول لمصعب مو ؟

الدكتور : مابعرف انا حبيت خبرك انتي شخصياً والك حرية التصرف

ومشي وتركها وهي خايفه وملبكة

دورت على ابوها وقالتلو الي سمعتو ونصحها ما تحكي لمصعب ليتعافى تمام ..

هيك ضلو بالمستشفى مخبين الموضوع لوقت ما تعافى مصعب ورجعتلو صحتو وطلعو على بيتهن

كانت رنيم مزينة البيت كلو ورد وعاملتلو اطيب الاكلات ومبسوطه فيه خيرات الله

وبس اتطمنت على صحتو وحست انو الكل صار يعرف الا مصعب وكل ما كان يسال عن امو يقلولو حجه شكل
قررت تقلو الحقيقة .. وهو انصدم متلها بالزبط
حس بفرح من جوا انو امو ما تخلت عنو .. وحس بخوف عليها

ترك كل شي وراح على بيت اهلو .. ولقي امو بالفرشة و كانت تعبانه
بوس ايديها وراسها و حضنها وهي ترضت عليه وفرحت انها شافتو بصحتو وعافيتو ..

#بعد_تلات_شهور

توفت ام مصعب على اثر المرض ... و رنيم تركت مدرستها لانو ما عاد تقدر تداوم وهي حامل
بس كانت ناويه ترجع تكمل بس تولد .. و كان مصعب فايت بحالة اكتئاب مشان امو ومحروق قلبو عليها وحاسس بالذنب
ورنيم تحاول تسعدو وتفرحو بأي طريقه ..

لوقت ما راحو عالدكتورة ... و عرفو انو رنيم معها تؤام بنات !! هاد الخبر طير مصعب من الفرح
ونساه زعلو وطلعو من حالة الاكتئاب تبعو

رجعو عالبيت وهن طاير عقلهن التنين ومو مسدئين .. سبحان الله لما بدو يعطي بيكرم عبادو وبعطيهن فوق توقعاتهن

فاتو على بيتهن .. وحط مصعب ايدو على بطن رنيم : يعني هلأ هون في بنوتين ؟

رنيم : هههههههه ايه

مصعب : ما عم سدء .. شو بدنا نسميهن ؟

رنيم : نسمي وحده نجاح على اسم امك .. و وحده فاتن على اسم امي

مصعب : اووووه فكرة بتجنن

رنيم حطت ايدها على خدو وتطلعت بعيونو : كتير مبسوطة انك ضحكت بعد كل هالفترة ..رجعت لطبيعتك الحمدلله

مصعب : اشتئتلك وليه

رنيم : هههه انا بالأكتر

مصعب : تعي لبوسك

رنيم : لااااااااا مشان عمليتك

مصعب : بالله؟

رنيم : ايه خايفه عليك ..

مصعب : ههههههه هبلة

ولدت رنيم بالسلامة وفعلاً جابت تؤام بنات وسمتهن نجاح وفاتن ... فرحو فيهن كتير
وكانو مدلالات العيله الكل يهتم فيهن وينفذ طلباتهن .. بس كان في مشكلة وحده

رنيم : لك نجاح اتركي اختك رح تشلخي شعرها

نجاح : بدي موتها بتثوفي

فاتن : انا رح موتك يا ام لثان

رنيم : مثعبببببببببببببب تعا ثوف بناتك جننوني

مصعب : اجا ووقف عند الباب وحك راسو : يمكن ما كان لازم نسميهن نجاح وفاتن ؟

رنيم : يمكن ..
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://6730.arabrevolution.biz
 
زواج طفلة بقلم مال الشام
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
ستوك تايمز  :: الفئة الأولى :: المنتدى الأول :: منتديات ادب وشعر :: قصص والرويات-
انتقل الى: